Ekaineko Karrikan aurkituko dituzuen edukien artean, aipatzekoa dugu Iruñeko hainbat eragilek abian jarritako "Aldatuko dugu", Iruñeko hizkuntza paisaia aldatzeko kanpaina berezia. Eta horren berri izateko, hilabete honetako gure hilabetekarian kanpainako bultzatzailea den Kontseiluko kide batekin solasean aritu gara; Maite Inda, Kontseiluko ildo sozialeko buruarekin. Hark azaldu dizkigu kanpainaren nondik norakoak eta euskaldun gisa ekarpena nola egiten ahal dugun ere.

Karrikiri Iruñeko Euskaldunon Topaguneak hilero antolatzen duen Karrisolasa ekimenaren baitan, heldu den asteazkenean, hilak 15, euskal agerkari digitalak izanen ditu solasgai. Izan ere, ZuZeu atariaren 4. urtemuga dela eta, Euskal Herrian erreferentzia bilakatu diren agerkari digitalen inguruan arituko gara; Argia.com (aldizkari digitala), Sustatu (interneteko albistegia) eta Zuzeu bera (orainkari horizontala), besteak beste.

Apirileko Karrika aldizkari atera berrian ikusi ahal izanen duzuenez, hilabete honetan berriro helduko diegu gure Karrikadantza saioei eta, betiko legez, hitzordua hilaren hirugarren larunbatean izanen da arratsaldeko 18:30ean.

Heldu den martxoaren 20ean Karrisolasa ekimenaren 17. saioari ekinen diogu eta Iker Martinez de Lagosek BAT Soziolinguistika aldizkariaren 84. zenbakian argitaratutako "Ziklo berri baterako GPS-a" izeneko artikulua hartuko dugu hizpide.